Усвоена Стратегија на Владата за соработка со и развој на граѓанското општество, со Акцискиот план 2025-2028

Владата на Република Северна Македонија, на седницата одржана на 8.7.2025 година, ја усвои Стратегијата на Владата за соработка со и развој на граѓанското општество, со Акцискиот план 2025-2028. Визија на овој стратешки документ е поддршка на инклузивен, независен и професионален граѓански сектор, кој е партнер на институциите во креирањето и реализацијата на стратешките цели на државата.

Принципи врз основа на кои се градат односите меѓу Владата и граѓанските организации, согласно оваа стратегија, се: Инклузивност и партиципативно планирање (граѓанскиот сектор ќе биде консултиран и вклучен во креирањето на политики за развој на државата), Сигурност и одговорност (правна сигурност и реформирање на законите кои се однесуваат на граѓанските организации) и Отвореност и транспарентност (неопходни инструменти за градење на еднаквост пред законот и одговорност на носителите на одлуки). Целите, мерките и активностите од оваа стратегија се систематизирани во две приоритетни области: 1. Создавање на поволна средина за функционирање и развој на граѓанското општество; и 2. Зајакната соработка и партнерство меѓу граѓанските организации и јавните институции. За динамично и инклузивно општество кое ќе претставува рефлексија на граѓанските потреби и интереси, неопходно е континуирано градење на капацитетите и професионално надградување на граѓанските организации. Со оваа стратегија, Владата потврдува дека слободата и независноста во нивното дејствување се водечки императив, бидејќи на тој начин ќе се овозможи самите граѓански организации да го заземат вистинското место во општеството. Според мислење на Советот за соработка меѓу Владата и граѓанското општество, од седницата одржана на 18.6.2025 година, усвојувањето на овој стратешки документ ќе придонесе кон унапредување на правната рамка за дејствување на граѓанските организации и механизмите за соработка и структурирано учество во процесите на креирање и следење на јавните политики, како и кон подобрување на финансиската одржливост на граѓанските организации и околината во која се развива граѓанското општество. Советот ќе го следи спроведувањето на Акцискиот план и ќе се залага планираните мерки и активности да се спроведат во консултации и соработка со граѓанските организации.