Одделението за соработка со невладини организации на Генералниот секретаријат на Владата на Република Македонија, во соработка со Канцеларијата за соработка со НВОи на Владата на Република Хрватска, во рамките на твининг проектот „Понатамошно институционализирање на структурирани механизми за соработка помеѓу Владата и граѓанскиот сектор“, финансиран од Европската Унија,  организира средби со претставници на локалната администрација и граѓанските организации, со цел споделување на заеднички искуства во соработката со граѓанскиот сектор и презентација на Акцискиот план за спроведување на Стратегијата на Владата за соработка со и развој на граѓанскиот сектор 2018-2020.

На 5 јули 2018 година во Клубот на органите на управата се одржа  тркалезна маса на тема „Понатамошно институционализирање на структурирани механизми за соработка помеѓу Владата и граѓанскиот сектор“, како дел од активностите на истоимениот твининг проект, финансиран од Европската Унија. Настанот се одржа со цел презентација на клучните активности на Предлог-Стратегијата на Владата на Република Македонија за соработка со и развој на граѓанскиот сектор, со Акциски план 2018-2020 и улогата на Советот за соработка со и развој на граѓанскиот сектор во спроведувањето и следењето на овој стратешки документ.