Më 6 prill 2022 është mbajtur seanca e gjashtë (tematike) e Këshillit për Bashkëpunim ndërmjet Qeverisë dhe Shoqërisë civile, kushtuar ofrimit të kujdesit social dhe shëndetësor në nivel nacional dhe lokal nga organizatat e shoqërisë civile. Përveç anëtarëve të Këshillit, në seancë ishin të ftuar dhe morën pjesë edhe përfaqësues të organizatave të shoqërisë civile aktive në këtë fushë. Seanca tematike u mbajt me iniciativë të anëtarëve të Këshillit nga radhët e organizatave të shoqërisë civile në fushat: Mbrojtja sociale dhe mbrojtja e fëmijëve, mbrojtja e personave të margjinalizuar dhe mbrojtja e shëndetit, bazuar në hartëzimin e kësaj çështjeje në strategjinë e Qeverisë për bashkëpunim dhe zhvillim të shoqërisë civile, me Planin e Veprimit 2022-2024 dhe Ligjin e ri për Mbrojtje Sociale. Informacioni për gjendjen në lidhje me ofrimin e mbrojtjes sociale  dhe shëndetësore nga organizatat e shoqërisë civile, të cilin Këshilli ia dorëzoi Qeverisë së Republikës së Maqedonisë së Veriut pas seancës, është hyrje në analizën e situatës dhe kapitull fillestar për një zgjidhje sistematike dhe të planifikuar të çështjeve të hapura në këtë fushë.

Më 17 mars 2022 është mbajtur seanca e 5-të e Këshillit për Bashkëpunim mes Qeverisë dhe Shoqërisë Civile. Këshilli shqyrtoi Propozim- programin për financimin e aktiviteteve programore të shoqatave dhe fondacioneve për vitin 2022 të Ministrisë së Sistemit Politik dhe Marrëdhënieve Ndërmjet Bashkësive, mbështeti qasjen e hapur të kësaj Ministrie për bashkëpunim dhe përfshirjen e dy anëtarëve të Këshillit në grupin e punës për përgatitjen e Propozim-programit, por vendosi të përcaktojë një mendim pasi Qeveria të marrë qëndrim përfundimtar për propozim- programin për financimin e aktiviteteve programore të shoqatave dhe fondacioneve për vitin 2022 të Sekretariatit të Përgjithshëm të Qeverisë. Lidhur me këtë çështje, Këshilli vendosi që t'i parashtrojë sërish kërkesë Kryeministrit dhe të bëjë njoftim publik dhe konferencë për shtyp.